ਦਰਸ਼ਕਾਂ ਨੂੰ, ਉਹਨਾਂ ਦੀਆਂ ਦਿੱਕਤਾਂ ਤੇ ਪ੍ਰੇਸ਼ਾਨੀਆਂ ਨੂੰ ਘਟਾਉਣ ਲਈ ਮਨੋਰੰਜਨ ਜ਼ਰੂਰ ਚਾਹੀਦਾ ਹੁੰਦਾ ਹੈ ਅਤੇ ਪੰਜਾਬੀ ਫਿਲਮ ਇੰਡਸਟਰੀ ਇਸ ਤਣਾਅ ਨੂੰ ਘਟਾਉਣ ‘ਚ ਕਦੇ ਅਸਫ਼ਲ ਨਹੀਂ ਹੁੰਦੀ। ਆਏ ਦਿਨ ਨਵੀਂ ਫਿਲਮ ਦੀ ਘੋਸ਼ਣਾ ਹੁੰਦੀ ਹੈ ਤੇ ਦਰਸ਼ਕ ਉਸ ਫਿਲਮ ਦੇ ਰਿਲੀਜ਼ ਹੋਣ ਦਾ ਇੰਤਜ਼ਾਰ ਕਰਦੇ ਹਨ। ਫਿਲਮ ਦੀ ਘੋਸ਼ਣਾ ਤੋਂ ਲੈਕੇ ਫਿਲਮ ਦੀ ਰਿਲੀਜ਼ ਤੱਕ ਦਰਸ਼ਕਾਂ ਨੂੰ ਉਤਸੁਕ ਰੱਖਣ ਲਈ ਨਿਰਮਾਤਾ ਵੀ ਹਰ ਸੰਭਵ ਯਤਨ ਕਰਦੇ ਹਨ। ਹੁਣ ਬਾਕਮਾਲ ਕਲਾਕਾਰਾਂ ਵਿੱਚੋਂ ਇੱਕ, ਗਾਇਕ ਤੇ ਅਦਾਕਾਰ ਗੁਰਨਾਮ ਭੁੱਲਰ ਨੇ ਆਪਣੀ ਫਿਲਮ ‘ਕੋਕਾ’ ਨਾਲ ਸਾਰਿਆ ਦਾ ਦਿਲ ਜਿੱਤਣ ਤੋਂ ਬਾਅਦ, ਆਪਣੀ ਅਗਲੀ ਪੰਜਾਬੀ ਫਿਲਮ ‘ਖਿਡਾਰੀ’ ਦਾ ਸ਼ੂਟ ਸ਼ੁਰੂ ਕਰ ਦਿੱਤਾ ਹੈ।
ਗੁਰਨਾਮ ਭੁੱਲਰ ਨੇ ਹੁਣ ਤੱਕ ਆਪਣੇ ਰੁਮਾਂਟਿਕ ਕਿਰਦਾਰਾਂ ਨਾਲ ਦਰਸ਼ਕਾਂ ਦੇ ਦਿਲਾਂ ‘ਚ ਖ਼ਾਸ ਥਾਂ ਬਣਾਈ ਹੈ ਤੇ ਆਪਣਾ ਹਰ ਕਿਰਦਾਰ ਬਾਖੂਬੀ ਨਿਭਾਇਆ ਹੈ, ਪਰ ਹੁਣ ਉਹ ਫਿਲਮ ‘ਖਿਡਾਰੀ’ ‘ਚ ਇੱਕ ਵੱਖਰੇ ਰੂਪ ‘ਚ ਨਜ਼ਰ ਆਉਣ ਵਾਲੇ ਹਨ। ਇਹ ਇੱਕ ਐਕਸ਼ਨ ਫਿਲਮ ਹੋਣ ਵਾਲੀ ਹੈ। ਗੁਰਨਾਮ ਭੁੱਲਰ ਐਕਸ਼ਨ ਕਰਦੇ ਕਿਹੋ ਜਿਹੇ ਲੱਗਣਗੇ ਤੇ ਕਿਹੜੀ ਖੇਡ ਖੇਡਦੇ ਨਜ਼ਰ ਆਉਣਗੇ ਇਸ ਦੀ ਫਿਲਹਾਲ ਅਸੀਂ ਕਲਪਨਾ ਕਰ ਸਕਦੇ ਹਾਂ, ਫਿਲਮ ਰਿਲੀਜ਼ ਹੋਣ ਦਾ ਥੋੜ੍ਹਾ ਇੰਤਜ਼ਾਰ ਕਰਨਾ ਹੋਵੇਗਾ। ਫਿਲਮ ‘ਚ ਗੁਰਨਾਮ ਭੁੱਲਰ ਨਾਲ ਟੱਕਰ ਲੈਂਦੇ ਨਜ਼ਰ ਆਉਣਗੇ ਅਦਾਕਾਰ ਕਰਤਾਰ ਚੀਮਾ।
ਫਿਲਮ ਖਿਡਾਰੀ ‘ਚ ਗੁਰਨਾਮ ਭੁੱਲਰ ਦੇ ਨਾਲ ਸੁਰਭੀ ਜੋਤੀ ਮੁੱਖ ਅਦਾਕਾਰਾ ਵੱਜੋਂ ਨਜ਼ਰ ਆਉਣਗੇ। ਸੁਰਭੀ ਜੋਤੀ ਜਿਨ੍ਹਾਂ ਨੇ ਕਈ ਪੰਜਾਬੀ ਤੇ ਹਿੰਦੀ ਨਾਟਕਾਂ ‘ਚ ਅਤੇ ਫਿਲਮਾਂ ‘ਚ ਕੰਮ ਕੀਤਾ ਹੈ। ਜਿਵੇਂ ਕਿ ਨਾਗੀਨ ‘ਚ ਬੇਲਾ ਸਹਿਗਲ, ਕਬੂਲ ਹੈ ‘ਚ ਜ਼ੋਇਆ, ਕੋਈ ਲੌਟ ਕੇ ਆਇਆ ਹੈ ‘ਚ ਗੀਤਾਂਜਲੀ ਦਾ ਕਿਰਦਾਰ ਨਿਭਾਇਆ ਹੈ। ਸੁਰਭੀ ਜੋਤੀ ਆਪਣੀ ਬਾਕਮਾਲ ਅਦਾਕਾਰੀ ਕਰਕੇ ਜਾਣੀ ਜਾਂਦੀ ਹੈ। ਫਿਲਮ ਦੀ ਮਸ਼ਹੂਰ ਸਟਾਰ ਕਾਸਟ ‘ਚ ਪ੍ਰਭ ਗਰੇਵਾਲ, ਲਖਵਿੰਦਰ ਲੱਖਾ, ਨਵਦੀਪ ਕਲੇਰ, ਮਨਜੀਤ ਸਿੰਘ ਵਰਗੇ ਕਲਾਕਾਰ ਸ਼ਾਮਿਲ ਹਨ।
ਫਿਲਮ ਧੀਰਜ ਕੇਦਾਰਨਾਥ ਰਤਨ ਦੁਆਰਾ ਲਿਖੀ ਗਈ ਹੈ। ਇਹ ਮਾਨਵ ਸ਼ਾਹ ਦੁਆਰਾ ਨਿਰਦੇਸ਼ਿਤ ਕੀਤਾ ਜਾਵੇਗਾ ਅਤੇ ਪਰਮਜੀਤ ਚਾਲੀ (ਗੈਂਗਸ ਆਫ ਫਿਲਮਮੇਕਰਸ) ਅਤੇ ਰਵੀਸ਼ਿੰਗ ਐਂਟਰਟੇਨਮੈਂਟ ਦੁਆਰਾ ਨਿਰਮਿਤ ਕੀਤਾ ਜਾਵੇਗਾ।
